Жыхары Свіслачы: “У доме Каліноўскіх павінен быць музей”

2010-10-30 20:21:20, Еўрарадыё

30 кастрычніка ў Свіслачы на Гродзеншчыне прайшлі мемарыяльныя ўрачыстаці ў гонар герояў паўстання 1863 года. Акцыю ўвесь час здымалі людзі ў цывільным, але ў ход традыцыйных мерапрыемстваў не ўмешваліся.

Некалькі дзесяткаў чалавек з Гродна, Мінска і Слоніма ўсклалі кветкі каля помніка Кастусю Каліноўскаму, на магіле ягонага брата Віктара і памятнага крыжа ў вёсцы Якушоўка. Сёлета ў рамках урачыстасцяў упершыню зладзілі “Лясную выставу кавалёў”. Проста на паляне ў лесе, дзе праходзіць нефармальная імпрэза, майстры Юрась Мацко, Алесь Панцяцей і Валер Жамойцін паказалі свае працы.

Пра тое, як павінна ўшаноўвацца памяць герояў славутага паўстання, Еўрарадыё расказаў жыхар Свіслачы, шматгадовы ўдзельнік мемарыяльных акцый Юрась Глебік:

“У ідэале тут павінен быў стаяць музей, карцінная галерэя, як гэта было запланавана. Пракладзена асфальтавая дарога, адноўлена ткацкая майстэрня Каліноўскіх. Многа людзей з навакольных вёсак, што прыйшлі ўшанаваць свайго земляка. І вялікі бардаўскі канцэрт у цэнтры Свіслачы на пляцы”.

Па словах Юрася Глебка праект рэстаўрацыі дома Каліноўскіх распрацаваны яшчэ ў савецкія часы і знаходзіцца ў краязнаўчым музеі.

Калі аўтобус з гродзенцамі прыехаў у Свіслач, праз імгненне з’явіўся міліцыянт. Ён ветліва прадставіўся і папрасіў, каб акцыя, як і ў папярэднія гады, прайшла на высокім арганізацыйным узроўні: “без аніякіх інцыдэнтаў і скаргаў з боку мясцовых жыхароў”.

Магіла Віктара Каліноўскага на свіслацкіх могілках.

Помнік нацыянальнаму герою Беларусі ў цэнтры Свіслачы.

З Мінска ў Свіслач прыехаў паэт Славамір Адамовіч (у цэнтры з відэакамерай).

Ад родавай сядзібы Каліноўскіх у Якушоўцы засталіся толькі падмуркі. Год таму месца пазначылі спецыяльным знакам.

Крыж героям паўстання 1863 года.

Рыгор Кастусёў размаўляе са скульптарам Валерам Жамойціным. У грубай жалезнай кампазіцыі кандыдата на пасаду прэзідэнта вельмі зацікавіў вытанчаны матылёк.