На падляшскім кінафестывалі перамог фільм пра беларускую памежную вёску

Яго аўтары Павал Міцкевіч і Арцём Лобач атрымалі Гран-пры на штогадовым фестывалі “Filmowe Podlasie Atakuje!”, што прайшоў у Беластоку 30 кастрычніка. 16-хвілінная стужка “Калеты” распавядае пра жыццё аднайменнай вёскі на польска-беларуска-літоўскай мяжы.  

Адзначым, што Павал Міцкевіч родам з Гродна. Ужо 7 год жыве ў Беластоку і актыўна займаецца культурніцкай дзейнасцю. Гэтая акалічнасць і дала права Паўлу ўдзельнічаць у фестывалі для падляшскіх кінематаграфістаў. На цырымоніі ўзнагароджання ён атрымаў дыплом і прыз - 2000 злотых.

Кінафестываль “Filmowe Podlasie Atakuje!” праходзіць з 2003 году. Ініцыятары, Беластоцкі цэнтр культуры, пазіцыянуе яго як прэзентацыю творчасці Падляшша, унікальнага рэгіёну, дзе перакрыжоўваюцца шмат розных культур.